A AAVV San Benito e San Sebastián solicitará medidas de mellora nos barrios e crea do Premio Fidenciano Palacín

A Asamblea anual da AAVV San Benito e San Sebastián celebrouse onte 17 de Marzo no salón de actos do Centro Cívico do Porriño cunha ampla asistencia de socios/as. A Asociación constatou unha importante suba de socios e aprobou as contas anuais, que segundo o secretario da Asociación de Veciños, Iván Vaqueiro, por segundo ano consecutivo recolleron un importante superavit económico polas accións desenvolvidas o que vai permitir impulsar novas actividades nos barrios.

A presidenta da Asociación de Veciños, Carmen Rodríguez Domínguez, anunciou dentro do Plan de Traballo para o 2017, que a Xunta Directiva pretende continuar coas actividades desenvolvidas no ano 2016 e incoporar aquelas propostas veciñais que permitan dinamizar o barrio. As actividades incluirán as tradicionais Festa do Calacú, a Festa do Chouripán, o Certame Literario, as proxeccións de cine nos Barrios, a colaboración coas Festas Ecolóxica e coa Festa dos Cachos e tamén as Andainas Saudables así como actividades deportivas como o Zumba, Pilates,… Se recolleu tamén o sentir de que é preciso que se realicen máis actividades para nenos  e nenas e mozos e mozas, así como a idea de que o Concello debería impulsar a creación dunha Ludoteca Municipal con coidadores/as, algo moi demandado polos veciños e veciñas do Porriño para axudar aos pais e nais traballadores.

No apartado de melloras nos barrios, a presidenta da Asociación, Carmen Rodríguez Domínguez afirmou que a Xunta Directiva vai recoller varias reivincicacións veciñais, entre as que destacaron a solicitude de pintado e correcta sinalizacion e vixiancia policial da parada dos autobuses na rúa Domingo Bueno (ocupada actualmente por coches aparcados), o pintado dos pasos de peóns, a mellora das rampas dos barrios ou o saneamento do barrio de San Sebastián, a sinalización e mellora das travesías que atravesan Manuel Rodríguez ou o tratamento dos Barrios no futuro PXOM, foron algúns dos temas tratados na asamblea que a Xunta Directiva se comprometeu a trasladar á Corporación Local, do mesmo xeito que o novo convenio de colaboración.

Por último, a instancias dos socios, a asociación creou o Premio Fidenciano Palacín para recoñecer o traballo dos veciños e veciñas pola mellora dos barrios do Porriño. O premio leva o nome do moi querido carteiro porriñés Fidenciano Palacín que foi impulsor de moitas melloras nos barrios e persoeiro ao que a Asociación propuxo á Corporación fai un ano que homenaxeara bautizando o entorno da Capela de San Sebastián como Praza de Fidenciano Palacín.